Wirtschaft: SBB beschäftigt jährlich 322 Mio. Arbeitnehmer. OHNE BEZAHLUNG!
So liebi Blogläser und Mitzugfahrer,Eusi liebi SBB hett mal weder chräftig in Hafe glänget.
In ihrem offizielle Fan-Heftli (via, Mai 2009, Siite 6), welches ich us langewili gläse han, stoht en sehr interessante Artikel (klick Rächts ufs Bild füre Grossasicht devo) über d Asichte vode SBB zu ihrne Chunde drinne.
Erstmol e churzi Rächtfertigung: Es isch mir bewusst, das de Text vomne Autor vode NZZ und ned direkt vode SBB stammt, da de Text aber ide via stoht, hett da zimmli sehr sicher d PR Abteilig vode SBB zumindest en Blick dri gworfe. Da de Artikel ned abglehnt worde isch, stimmt d SBB dem also zue.
So. De Walti W. frogt ide Kollumne: "Fragen Sie van Rooijen" ob mer ächt sell ufhöre telefoniere, wenn de Kondukteur s Billet will gseh.
D Antwort do druf isch jetzt aber ned nur unerhöhrt sondern au unlogisch.
Im erste Teil dueni gern zuestimme: De Kondukteur seit aständig Grüezi und bedankt sich fürs Billet zeige, de chamer sovill Astand zeige und s Gspröch unterbräche.
Jetzt wirds aber absurd.
"Der Chef im Zug ist für die Dauer Ihrer Reise ihr Vorgesetzter."Sobald ich also Zugfahr, wird de ZugCHEF min Vorgsetzte... Wie muen ich das jetzt gseh? Schwarzarbet (ich han da emel no nie de Stüüre ageh, dasi täglich 2 Stund im Zug schaffe) ohni bezahlig? Irgendwie hani au nie mis Iverständnis dezue geh... Isch das denn Sklaverei? Mich wunderets im Ernst was de van Rooijen sich bi dene Sätz dänkt hett.
"Sie hören ja im Büro auch mit dem Nasenbohren auf, wenn der Chef reinkommt[...]"
Wahrschindlich spieglet das eifach s Monopoldänke vode SBB wider:
MIR biete euch d Bahn, defür...
... zahled eusi übertüürete Tickets.
... ignorieret die Regelmässige verspötige, wo mir sälte als solchi abbuechet.
... sind ihr eusi Bimbos!
Ich hoffe mer ghört mini Entrüschtig es bizli use... Ich mein, verstönd mich ned falsch, de Kondukteur brucht klar en gwüssi Autorität und isch für d Ihaltig vode Regle im Zug (Kei Schueh ufd Polster, Schnauze im Ruheabteil, Gültigs Billet) verantwortlich. Aber es chan wohl ned si, das ich, wennich e Dienstleistig bezieh für tüürs gäld, dasi denn vom Dienstleister bevormundet wirde und mini Reis nach sine Vorstellige muen führe, obwohl ich eigentlich keinerlei vo de veribarte Regle bräche würd! Astand schön und guet, aber sone Befehlsufforderig chömmer eus ned büüte loh!
Ich hoff das mini Anahm falsch gsi und das nur e unbearbeitete Bitrag vomene Unbeteiligte gsi isch, wo d Meinig vode SBB ned widerspieglet.
Btw: 322 Mio Arbeitnehmer: http://mct.sbb.ch/mct/konzern.htm
posted by Dröli at 4:12 PM
6 Comments:
scho chli denebed...
Vor allem wends doch immer wüsse vo wo nach wo mir ane wend, da gaht die aso au nüt ah weni es Abo chauf für über 1300.- im Jahr! Will au mini Rue im Zug, de chönds ufhöre mit so läschtige Frage! Und nei, ich zeig dene kei Respekt, und begrüesse dunis erscht recht nöd, die söled ihre Job mache und d Chunde in fride la!
dänksch nöd, dass dä artikel au chli mit humor z näh isch?
und zu de frag nach start- und zielort: wiä wänns susch wüssä, wivill lüüt i wellnä züg hocked? diä aagabe sind wichtig zur bereitstellig vom rollmaterial
Stosszite sind vo 17-19 Uhr, das weis jede, den sind all züg vole, das gaht au ohni Chunde beläschtige... Susch am tag sind die züg läär... Und susch hends ja noierdings ihri Kameras stationiert, Söleds ma ab und zue es Aug druf werfe, den gsends wos überlaschtige het. Und susch mündses andersch organisiere. Das chas ja nöd sie, wen ich es Auto chauf, dass d garage zersch mal fröged wonich so überal anefahr, uf welne strasse, wie viel mal pro wuche, usw... Find s het scho sini grenze, s git ja au no e gwüssi privats färe. Münd ja nöd gad all im abteil wüsse vo welere hundsverlochete ich chume!
Wenn de Artikel humoristisch gmeint gsi isch, hanis ned chönne useläse. Wonis zum erste mol gläse han, hett min Puls würkli grast. Das passiert eigentlich nur wenn öpper sini Macht missbrucht. (Dönt chli komisch us mim mul irgendwie...)
Uf jedefall... Bi eus ide Bude, hämmer z.B. d Regle, das kein Agstellte es Interview über d Firma döf geh, sondern immer an d Medieverträttig muen verwiese. Das hett de Grund, das dur irgendwelchi ussage, vomene potentiell unzfridene Mitarbeiter s Image vode Firma gschädigt wird.
Speziell bimene vo de Firma usegebene Heft, nimm ich doch starch a, dass das vo lüt Korrekturgläse wird, wo sich chli mit Public Relations uskenned.
Minere Meinig noche isch das do falsch gloffe.
Die Sach mitem Abfahrts und Akunftsort:
Abkläre wievill Rollmaterial uf dere Strecki benötigt wird, isch sicher ei Möglichkeit (obwohl vo villne SBB verteidiger öfter s Argumänt brocht wird, das chlineri Intervall ufgrund vo Rollmaterialmangel und de dementsprächende choste ned mögli sige...)
Wasi aber do in rum wott werfe... Naja, ade Bahnhofsstross e Lade z betriebe isch tüürer als eine in... kA... Hinterdorfkaffstross. Wieso? Ade Bahnhofsstross hetts meh lüt! Aha. Jetzt fahre also bsunders vill lüt vo Bern nach Züri... ja, stimmt, die Strecki isch eigentli prislich eh unterem durchschnitt gsi... he weisch wa, mer erhöhe da eifach mol...
Isch nur e Theorie, chan da ned mit Fakte belegge...
James mit dim Iwand hesch rächt. Muen würkli ned jede Typ im Zug wüsse wo du anefahrsch... 2 Möglichkeite:
- Lüge
- D Ussag verweigere. Das wirdi au nöchstmal probiere...
Übrigends Anonym: Anonymi comments hani ned so gern =)
Speziell bimene vo de Firma usegebene Heft, nimm ich doch starch a, dass das vo lüt Korrekturgläse wird, wo sich chli mit Public Relations uskenned.
Es isch es Kolumne. "Meinungsbeitrag". Vom Autor. Es passt zu Thema, also warum ned veröffentliche? Es muss ja ned mit de Asicht vom Herusgeber überistimme.
Zumal... WTF. Das mitem Chef wird überspitzt dargstellt, genauso wie din Artikel. So what. Ich verstah dini Ufregig immer nanig ^^
Und de Verglich mit em Auto isch ja wohl unterirdisch schlecht.
Ich gseh zwar keis Problem debi, em SBB Typ z'säge vo wo nach wo ich fahre, aber wenn eu das psychisch belaschtet, gäbed eifach kei Antwort oder stelled eu tot :D
Im Grund gno find ich aber au die Aktione (vo de ZVV glaub) besser, wo's so Fötzel verteiled, womer cha achrützle, vo nach wo mer fahrt, wie oft, und zu welere Ziit. Isch eh ussagechräftiger und nach Wunsch au anonym :P
weisst Sunset schon dass du 2 Arbeitsgeber hast? Vertraglich ist dass nicht erlaubt :P
Kommentar veröffentlichen
<< Home